Copyright (c) Memodata 1998-2005
Direct access Aide
 

Chapitre 20

Comment Thaumaste racompte les vertus
et sçavoir de Panurge.

 

 

Adoncques se leva Thaumaste, et, ostant son bonnet de la teste, remercia ledict Panurge doulcement ; puis dist à haulte voix à toute l'assistance :

" Seigneurs, à ceste heure, puis je bien dire le mot envangelicque : Et ecce plus quam Salomon hic. Vous avez icy un thesor incomparable en vostre presence ; c'est Monsieur Pantagruel, duquel la renommée me avoit icy attiré du fin fond de Angleterre pour conférer avecques luy des problemes insolubles, tant de magie, alchymie, de caballe, de egomantie, de astrologie, que de philosophie, lesquelz je avoys en mon esprit.

Mais de present je me courrouce contre la renommée, laquelle me semble estre envieuse contre luy, car elle n'en raporte la miliesme partie de ce que en est par efficace.

Vous avez veu comment son seul disciple me a contenté et m'en a plus dict que n'en demandoys ; d'abundand m'a ouvert et ensemble solu d'aultres doubtes inestimables. En quoy je vous puisse asseurer qu'il m'a ouvert le vrays pays et abisme de encyclopedie, voire en une sorte que je ne pensoys trouver homme qui en sceust les premiers elemens seulement ; c'est quand nous avons disputé par signes, sans dire mot ny demy. Mais à tant je redigerai par escriptce que avons dict et resolu, affin que l'on ne pense que ce ayent esté mocqueries, et le feray imprimer à ce que chascun y apreigne comme je ay faict, d'ont povez juger ce que eust peu dire le maistre, veu que le disciple a faict telle prouesse, car Non est discipulus super magistrum.

En tous cas Dieu soit loué, et bien humblement vous remercie de l'honneur que nous avez faict à cest acte ; Dieu vous le retribue eternellement. "

Semblables actions de graces rendit Pantagruel à toute l'assistance, et, de là partant, mena disner Thaumaste avecques luy, et croyez qu'ilz beurent à ventre deboutonné, ­ (car en ce temps là on fermoit les ventres à boutons, comme les colletz de present) ­ jusques à dire : D'ont venez-vous ?

Saincte Dame, comment ilz tiroyent au chevrotin, et flaccons d'aller et eulx de corner :
" Tyre !
- Baille !
- Paige, vin !
- Boutte, de par le diable, boutte. "

Il n'y eut celluy qui ne beust vingt cinq ou trente muys et sçavez comment ? Sicut terra sine aqua, car il faisoit chault ; et dadvantaige, se estoyent alterez.

Au regard de l'exposition des propositions mises par Thaumaste, et significations des signes desquelz ils userent en disputant, je vous les exposeroys selon la relation d'entre eulx mesmes, mais l'on m'a dict que Thaumaste en feist un grand livre, imprimé à Londres, auquel il déclaire tout sans rien laisser. Par ce, je m'en deporte pour le présent.

 

 

Copyright (c) Memodata 1998-2004